Yana dalalarning shovqini tindi,
Yana raqqosadek tindi momiq qor.
Yanvar oqshomlari, ayvonda endi
Xayol surmaklikni etding ixtiyor.
Bu — oyna ko‘l emas, qish — bu, zamharir
Ko‘ngil tublarida sirli xayollar.
Borliq ham misoli o‘ychan musavvir
Naqsh etmish derazang uzra savollar.
Zangori bahorni yotar tush ko‘rib,
Qaydadir — ummonlar tubida quyosh.
Momo qish oq jujun to‘qir o‘ltirib,
Kelinchak zaminga yagona sirdosh.
Oppoq ro‘moliga o‘rab kurtagin
Uxlaydi qish bo‘yi bu zangor chiroy.
Faqat, orom ol, deb so‘ylab ertagin
Kezadi dalalar tepasida oy…
✍️ 1978
Ijtimoiy tarmoqlarda biz bilan birga boʻling: